Эгцхэн дээр үдийн нар голлоно

Эмээ дээлээрээ сүүдэр босгоно

Ээх наранд өөрөө шарагдана

Ханиад хүрээд хүндрэн хэвтлээ

Хажууд эмээ сандран шогшлоо

Эвий ач минь оронд чинь

Эмээ нь өвддөг болоосой! гэнэ

Миний

Эмээ

Ийм л сайхан

Санаатай

Энхрий наддаа

Хайртай

Эмээ

Юм аа.

Өглөө бостол цав цагаан

Өнгөрсөн шөнө цас даржээ

Эмээ даруй шүүрээ шүүрэв

Эргэн тойрны цасыг шүүрдэв

Хамаг хүүхэд хальтрах вий гэж

Хавийн цасыг арилган явна

Орчны хүүхэд ойчих вий гэж

Олны замыг цэвэрлэн явна.

Миний

Эмээ

Ариун цагаан

Санаатай

Айлын хүүхдэд

Хайртай

Эмээ

Юм аа

Уранхай цамцтай туранхай биетэй

Уруухан царайтай доройхон жаалыг

Үдшийн цэнхэр дэлгэцнээс үзээд

Үнэхээр өрөвдсөн миний эмээ

Онгорхойг нь оёж өгөхсөн гэнэ

Ханзархайг нь хатгаж өгөхсөн гэнэ

Цагаан идээгээр цатгахсан гэнэ

Цай хоолоор дайлахсан гэнэ

Миний

Эмээ

Дэлгэр уужуу

Сэтгэлтэй

Дэлхийн хүүхдэд

Хайртай

Эмээ

Юм аа.