Дэлхийн хөрсөнд хичнээн ч цэцэг

Дэлбээлж амжилгүй гандана вэ

Хаа сайгүй хичнээн ч хүүхэд

Хайр амсалгүй гундана вэ

          Хүмүүс минь ээ, хүмүүс минь ээ

          Хүүхэд бол хүүхэд шүү дээ

          Томоогүй жаахан тэдний маань

          Тоглон шуугих нас нь шүү дээ

Манай гаригт хичнээн ч өдөр

Манан будантай өнгөрнө вэ

Энд тэндгүй хичнээн ч жаал

Инээд баясалгүй өснө вэ

          Хүмүүс минь ээ, хүмүүс минь ээ

          Хүүхэд бол цэцэг шүү дээ

          Навчин дундаас цэцгийн дэлбээ

          Нарын гэрэлд дэлгэрнэ шүү дээ

Даян дэлхийд хичнээн ч гэр

Дайны галд эрсдэнэ вэ

Түмний гэмгүй хичнээн ч үр

Түүний хөлд өртөнө вэ

          Хүмүүс минь ээ, хүмүүс минь ээ

          Хүүхэд бол маргааш шүү дээ

          Газар дэлхийн хувь заяа

          Ганцхан тэдний гарт шүү дээ

(аяыг Б.Шарав)